2020 nienz 11 nyied 24 hauh 15:00, Aen yizsiz Gvangjsih Minzcuz Yijvwnz Yenzgiu Cunghsinh yiengq Nanzningz Swhfan Dayoz Codaengj Gyauyuz Yozyen soengq saw youq Cangzgangh yaugih Hingcihyenz 105 gawjhengz. Yozyen suhgi Bungz Yinghbyauh cujciz.
Baez hozdung neix miz lai boux hekgviq camgya, gyoengqde dwg: Gvangjsih Minzcuz Yijvwnz Yenzgiu Cunghsinh cujyin Vangz Yuzmungj、fanhoiz fuzvubu cujyin Moz Binh、fanhoiz fuzvubu fucujyin Yangz Yijcingz、bangunghsiz fucujyin Vangz Ginghing、bangunghsiz cujyin gohyenz Vangz Lizsun、Nanzningz Swhfan Dayoz dangjveij veijyenz、 cangzveij、cungjgvaigiswh Liengz Gyahbinh、Codaengj Gyauyuz Yozyen yencangj Liengz Yij、dangjveij suhgi Bungz Yinghbyauh、fuyencangj Luz Ginjcinh、dangjveij cujcizyenz Hoz Cungh、hi Cuengh Gun Song Vahsaw cujyin Liengz Cunhlenz daengj. Yozyen Sanghyijhi lauxsae caeuq hagseng daibyauj camgya.
Youq gwnz yizsiz, Liengz Yij yencangj angqcoux gak boux hekgviq daeuj daengz gizneix, de daibyauj yozyen docih Gvangjsih Minzcuz Yijvwnz Yenzgiu Cunghsinh soengq hawj raeuz gyaciz 107626 maenz 1536 cek dozsaw. Caemhcaiq maqmuengh gyoengq doengzhag insik doengh gij saw dijbauj neix, hag ndei、yungh ndei gyoengqde, Vih Cuengh Gun Song Vahsaw songyau、vih swnjcienz caeuq fazcanj minzcuz vwnzva okrengz swhgeij.
Gvangjsih Minzcuz Yijvwnz Yenzgiu Cunghsinh cujyin Vangz Yuzmungj gangj daengz sam diemj: It dwg baez neix soengq saw miz song cungj, Sawloih Cuengh Gun caeuq gij saw Sawcuengh Suijbingz gaujsi, gyoengq saw neix cungj dwg lai boux canghak yungh hauj lai bi sij baenz, muengh gyoengq doengzhag insik ndei、yungh ndei, vih Cuengh Gun Song Vahsaw gyauyuz saehnieb daegbied dwg guhndei guekgya vwnzva ak daez ok youq cib seiq haj gveihva caeuq yenjgingj gveihva haenx guh ok gung’yen raeuz. Ngeih dwg minzcuz gunghcoz aeu miz vunz swnjciep, muengh gyoengq doengzhag hag ndei conhyez cihsiz, rap dawz aen rap swnjcienz minzcuz vwnzva. Sam dwg muengh yen raeuz gyoengq lingjdauj caeuq lauxsae lai caeuq Gvangjsih Minzcuz Yijvwnz Yenzgiu Cunghsinh youq sawloih biensij、Gvangjsih yijyenz swhyenz baujhoh daengj doxgyau doxbang.
Ciep daeuj guh gij yizsiz Gvangjsih Minzcuz Yijvwnz Yenzgiu Cunghsinh yiengq Nanzningz Swhfan Dayoz Codaengj Gyauyuz Yozyen soengq saw.
Yizsiz guh liux, Yozyau dangjveij veijyenz、cangzveij、cungjgvaigiswh Liengz Gyahbinh daibyauj yozyau docih Swcigih Minzcunghveij, docih gyoengqde itcig gvansim caeuq cihciz gijhong Cuengh Gun Song Vahsaw Swhfanswngh beizyangj hagdangz raeuz caeuq gij hong wnq. Caemhcaiq maqmuengh Swcigih Minzcunghveij laebdaeb baujciz caeuq yozyau raeuz doxgap doxndei, lai cijdauj、 bangcoh gij minzcuz vwnzva gensez hagdangz raeuz, doengzcaez vih gensez Gvangjsih gyaeundei okrengz.
Doeklaeng, gyoengq doengzhag eu hot fwen 《Fwen Soengq Hek》soengq gakboux hekgviq，hozdung daengz neix couh sat lo.
Baez yizsiz soengq saw neix, raeuz ndaej raen Gvangjsih Minzcuz Yijvwnz Yenzgiu Cunghsinh gvansim caeuq cihciz gyauyuz saehnieb, doengh gij dozsaw neix ndaej hawj gyoengq doengzhag engq liujgaij gij minzcuz vwnzva Bouxcuengh, ndaej hawj gyoengqde hag ndaej engq ndei.
